Saluton!
Unue mi volas esprimi mian dankon al ĉiuj, el kiuj kelkaj eĉ ne konanta min persone, sendis ian apogan mesaĝon al mi spure de la lasta redakcia enkonduko, en kiu mi informis pri la malfeliĉa okazaĵo fine de la pasinta jaro. Tiaj mesaĝoj estas ja helpaj psikologie. Kiam proksimulo spertas mortoperdon, ni ne scias kion diri, sed sufiĉas kelkaj amikaj vortoj por ke vi faru la amikon senti iomete pli bone kaj tia gesto ne estos forgesata.
Ne hazarde, nia nuna eldono prezentas la temon “Sano kaj Malsano” kiel ĉefartikolo. De Juan Carlos Monteiro el Kubo venas la artikolo pri kuracisto, kiu helpis la batalon kontraŭ la Ebola-disvastiĝo en Sieraleono. Li infektiĝis kaj grave malsaniĝis, sed post kuracado revenis por daŭrigi la laboron. El Ĉeĥio, Max Kašparů prezentas hipnoterapion kaj ĝian uzadon en medicinaj fakosferoj. Ana Ribeiro el Brazilo proprasperte asertas ke por bona sano gravas ne droniĝi en farendaĵoj kaj havi tempon por si mem. Laste pri la temo, patro, kiu perdis sian filinon pro komplika sanproblemo en juna aĝo, rememoras la tragedian situacion kaj meditas prie.
Nia gasto en la intervjua rubriko estas mia konato delonge, ĉar mi estas admiranto de lia muzika laboro sed, malgraŭ tio, mi konfesas ke ĝis ĉi tiu intervjuo, mi neniam êc provis prononci la familian nomon de Amir Hadžiahmetović, sed li malkovrigis al mi la sekreton: Haĝiahmetoviĉ. Kun la kunlaboro de multaj gastoj, Amir kiel gitaristo kaj kantisto de la bando Espo Despo lanĉis albumon per kiu li revizitas siajn muzikajn radikojn en Bosnio kaj Hercegovino.
TEJO-Tutmonde, sub la redaktorado de Massimo Ripani nun iĝis Movada Rubriko. KontakTEK speciale por ĉi tiu numero aperigis notojn nur rilatajn al medicino. En Recenzoj vi povas legi pri du KD-oj eldonitaj ankoraŭ en 2016. La Blaga Blogo rakontas pri “perfekta” murdoplanado; en Tiel la Mondo, István Ertl preferas ne prognozi pri tio, kion li verkos en 2017, ĉar neantaŭvideblaĵoj tro oftas en la mondo. Vizaĝojn de kelkaj homrajtaj herooj vi konos danke ankaŭ al Ertl, sed al Klara, filino de István. Eĉ kolorigitajn fotojn de la pli ol centjara Titanic vi trovos ĉi-numere. Mi esperas ke vin ne tro ĝenas la nuna malfrua apero de la numeroj. Mi promesas ke mi faros ĉion eblan, laŭ miaj ne tiom fidindaj fortoj, por akuratigi. Dum la jaro, mi esperas, mi fariĝos pli menskapabla por akurate liveri al vi la karan Kontakto.
La elŝutado de tiu ĉi numero eblas nur por abonantoj. Por elŝuti ĝin vi devas iri al la paĝo http://reto.uea.org/, ensaluti kaj poste elekti la sekcion “Teko”. Se vi ankoraŭ ne estas abonanto, vi povas tuj aboni ĝin per reta abonilo. Laŭ la nova reguloj, homoj ĝis 35 jaroj daŭre estas TEJO-memboj. La “novaj junuloj” jam povas elŝuti Kontakto-n, sed kun nepra kondiĉo, ke en la datumbazo de UEA estu registrita ilia naskiĝdato. La elŝutado de Kontakto por 30-35-jaruloj estas funkciigita nur en la ĉefa retejo: uea.org/revuoj/
Kore
Rogener PAVINSKI
Redaktoro de Kontakto
Rogener PAVINSKI
